अखबारपत्र:काठमाडौँ, पुस १९। नेपाली कांग्रेसका नेता डा. शेखर कोइरालाका दाजु निरञ्जन कोइराला ‘निरू दा’ को निधन भएको छ।
कोरोनाबाट पीडित उनको उपचारको क्रममा भारतको नयाँ दिल्लीमा आज बिहान ११ बजे निधन भएको हो। पर्यटन व्यवसायी र तत्कालीन पर्यटनमन्त्री रामहरि जोशीको विज्ञ सल्लाहकार समेत रहेका कोइरालाको नयाँदिल्लीको म्याक्स अस्पतालमा उपचाररत थिए।
सामाजिक सञ्जाल ट्वीटरमा ट्वीट गर्दै डा. कोइरालाले भनेका छन्, “मेरा आदरणीय दाजु ‘निरूदा’ को आज बिहान नयाँ दिल्लीमा भएको निधनले म, मेरो परिवार र भतिजाहरू मर्माहत भएका छौं।”
निरञ्जनकी श्रीमतीको निधन भइसकेको छ। उनका हाल दुई जना छोरा छन्।
दाजु बिरामी परेपछि गत पुस १४ गते नयाँदिल्ली गएका शेखर अहिले पनि नयाँदिल्लीमै छन्। आजै ‘निरू दा’ को नयाँदिल्लीमै अन्त्येष्टि गर्ने तयारी गरिएको छ ।
