अखबारपत्र : काठमाडौ- असोज ४। छुट्टाछुट्टै ठाउँमा भएको सवारी दुर्घटनामा चारजनाको मृत्यु भएको छ।
दाङको शान्तिनगर गाउँपालिका-३ रानीवनमा मोटरसाइकलको ठक्करबाट एक पैदलयात्रीको मृत्यु भएको छ। रा.३ प १०९४ नम्बरको मोटरसाइकलको ठक्करबाट गम्भीर घाइते भएका आइते रोकाको उपचारको लागि बाँकेको नेपालगञ्जतर्फ लैजाने क्रममा बाटैमा मृत्यु भएको प्रहरीले बताएको छ।
जिल्ला प्रहरी कार्यालय बाँकेले जनाए अनुसार ठक्कर दिने मोटरसाइकल र चालकलाई नियन्त्रणमा लिएर अनुसन्धान भइरहेको छ।
यस्तै, महोत्तरीको बर्दिबास नगरपालिका-६ मा ज.१ च १८४६ नम्बरको बोलेरोले ‘अनटेस्ट’ लेखेको मोटरसाइकललाई हिजो साँझ ठक्कर दिँदा ३२ वर्षीय प्रमोद राय र २८ वर्षीय देवबहादुर खपाङ्गीको मृत्यु भएको छ। बोलेरो चालक फरार छन्।
कपिलवस्तुको बुद्धभूमि नगरपालिका-९ चम्पापुरमा बसको ठक्करबाट एकजनाको मृत्यु भएको छ।
मृत्यु हुनेमा ३१ वर्षी फिरोन तामाङ छन्। ग.१ ख ८९७४ नम्बरको बसको ठक्करबाट पैदलयात्री तामाङ गम्भीर घाइते भएका थिए।
जिल्ला अस्पताल तौलिहवामा उपचारको क्रममा उनको मृत्यु भएको हो। धादिङको गंगाजमुना गाउँपालिका-१ घर भएका उनी विजयनगरस्थित ससुरालीमा बस्दै आएका थिए।
